Teknoløft Sogn og Fjordane

Prosjektet Teknoløft Sogn og Fjordane har bygd næringsretta kapasitet og kompetanse innan robotikk, stordata, digitalisering og automatisering ved Høgskulen på Vestlandet og Vestlandsforsking. Prosjektet hadde som målsetting å doble finansieringa for forskingsbasert innovasjon innan robotikk og stordata i Sogn og Fjordane, og dette har prosjektet lukkast med. Samla sett har prosjektet bidrege til at meir enn 220 millionar kroner blir brukt til forskingsprosjekt i regionen, og av dette er 108 millionar kroner utløyst frå Forskingsrådet, og over 60 millionar frå lokalt næringsliv. Prosjektet har lukkast godt med å bygge næringsretta kompetanse, og saman med næringslivet i regionen har prosjektet resultert i to samarbeidsprosjekt (KSP), eit teknologikonvergensprosjekt, eit polsk-norsk samarbeidsprosjekt, og fire innovasjonsprosjekt (IPN) i næringslivet i prosjektperioden. I tillegg har prosjektet etablert eit forskings- og innovasjonssenter for robotikk ved HVL delfinansiert av næringslivet. Prosjektet har og lukkast med å bygge næringsretta kapasitet ved forskingsinstitusjonane, og det samla fagmiljøet har vokse frå 3 årsverk ved starten av prosjektet i 2018 til nesten 20 årsverk ved inngangen av 2025. Ein har og lukkast med å rekruttere kvinner til tradisjonelt mannsdominerte fagstillingar innan teknologi, og det er no om lag 35% kvinner i fagmiljøet på tvers av Høgskulen og Vestlandsforsking. Prosjektet har og drive kompetanseheving gjennom fire doktorgradsprosjekt på robotikk og stordata, der ein kandidat har disputert, ein ligg an til å disputere i 2025, og to kandidatar skal levere inn avhandlinga i løpet av 2025. Det har og vore fagleg opprykk til seniorforskar og professor som resultat av prosjektet. Høgskulen på Vestlandet har etablert ein ny mastergrad innan anvendt datateknologi og ingeniørvitskap ved Høgskulen på Vestlandet som følgje av prosjektet, og det har vore gjennomført etter- og vidareutdanningskurs innan m.a. blokkkjeder gjennom prosjektet. Faglege resultat er formidla gjennom meir enn 30 vitskaplege publikasjonar frå prosjektet, og prosjektet har hatt stor merksemd på populærvitskapleg formidling – og særleg brukarretta formidling med meir enn 70 møter med unike lokale bedrifter i prosjektperioden.. Prosjektet har lukkast med å realisere målsettinga om å skape eit berekraftig forskingsmiljø på stordata og på robotikk i regionen, og å doble finansieringa til forskingsbasert innovasjon i Sogn og Fjordane.

Prosjektet hadde som målsetting å bygge eit sterkt forskings- og utdanningsmiljø på tvers av Høgskulen på Vestlandet og Vestlandsforsking innan robotikk og stordata, og som kunne bidra næringsrelevant kompetanse og kapasitet for meir forskingsbasert innovasjon i Sogn og Fjordane. Målsettinga var å doble den årlege løyvinga frå Forskingsrådet og EU til næringsretta forsking i regionen. Prosjektet har lukkast godt med å bygge kapasitet i forskingsmiljøa. Fagmiljøet har vokse frå 3 årsverk ved starten av prosjektet i 2018 til nesten 20 årsverk ved inngangen av 2025, og av dette er over halvparten faste stilling – slik at kapasiteten er bygd for å skape ein varig effekt av prosjektet. Prosjektet har og lukkast i å skipe ein ny masterutdanning innan anvendt datateknologi og ingeniørvitskap som utdannar kandidatar med mastergrad til næringslivet i regionen, og som bidreg med etterspurt kompetanse – og relevant forsking gjennom masterprosjekt. Prosjektet har og lukkast godt med å bygge næringsretta kompetanse i høve spin-off prosjekt saman med næringslivet. Prosjektet har resultert i to samarbeidsprosjekt (KSP), eit teknologikonvergensprosjekt, eit polsk-norsk samarbeidsprosjekt, og heile fire innovasjonsprosjekt i næringslivet (IPN), og i tillegg er det etablert eit forskings- og innovasjonssenter for robotikk ved HVL delfinansiert av næringslivet. Totalt har prosjektet bidrege til å utløyse forskings- og innovasjonsprosjekt for meir enn 220 millionar kroner i regionen, der næringslivet sjølve har satsa meir enn 60 millionar kroner på forskingsbasert innovasjon. Fagmiljøet er blitt eit berekraftig næringsrelevant forskingsmiljø for næringslivet i regionen, og har lukkast med å mobilisere næringslivet til meir forskingsbasert innovasjon.

Teknoløft Sogn og Fjordane skal auke kapasitet og kompetanse i forskingsmiljøa ved Høgskulen på Vestlandet og Vestlandsforsking på områda digitalisering og automatisering. Målsettinga er at meir relevante forskingsmiljø i regionen skal føre til at næringslivet i større grad etterspør forsking for utvikling og innovasjon, og at prosjektet skal stimulere til nye samarbeid om forsking og innovasjon med partnarar i og utanfor Norge. Dei to hovudsatsingane i prosjektet er å utvikle kompetanse på meir fleksibel automatisering med robotar i små og mellomstore bedrifter, og å utvikle meir næringsretta kompetanse innan stordata (Big Data) som kan gjere det lettare for bedrifter å ta i bruk data til innovasjon og omstilling. Satsingane skal auke toppkompetansen i fou-miljøa og utdanne nye doktorgradsstipendiatar i næringsrelevante problemstillingar. For å auke tilgangen på relevant og kompetent arbeidskraft i fylket skal prosjektet og utvikle nye næringsrelevante etter- og vidareutdanningstilbod, og har som mål å utvikle ei masterutdanning i robotikk og digitalisering. Dei fleste bedrifter vil før eller seinare måtte omstille seg drastisk for å møte det digitale skiftet. Målsettinga for Teknoløft Sogn og Fjordane er å bidra til å lette omstillinga i bedriftene gjennom deling av kunnskap, problemstillingar og kompetanse mellom fou-miljø og næringsliv. Prosjektet rettar seg mot eit breitt spekter av små og mellomstore bedrifter i Sogn og Fjordane, og tek sikte på å stimulere flest mogleg av dei til eit løft på områda digitalisering, robotisering og automatisering. Slik kan næringslivet ta aktivt del i det digitale skiftet . Prosjektet vil særleg legge vekt på samarbeid med IT-bedrifter som er langt framme når det gjeld digitalisering av produksjon og tenesteyting, og med produksjonsnæringar og energibransjen i Sogn og Fjordane. Prosjektet har som mål at den næringsretta forskingsbaserte innovasjonsaktiviteten i Sogn og Fjordane minst skal doblast i løpet av prosjektperioden.